2. पावा येथे वास्तव्य

भगवान बुद्ध आणि त्यांचा धम्म
~लेखक: डॉ. बाबासाहेब आंबेडकर
*************************
सातवा खंड- भ्रमणिकाची अंतिम यात्रा
Book VII- The Wanderer's Last Journey
*************************
भाग दुसरा - वैशालीचा निरोप
Part II- Leaving Vesali
*************************
2. पावा येथे वास्तव्य
Halt at Pava
*************************

1) तथागत बुद्ध वैशालीहून भंडग्रामास गेले.

2) भंडग्रामाहून हठिग्रामास व तिथून भोग नगरास ते गेले.

3) भोग-नगराहून ते पावा येथे गेले.

4) पावा येथे तथागत बुद्ध चुंद नामक लोहाराच्या आम्रवनात वास्तव्यासाठी गेले.

5) तथागत बुद्ध पावा येथे आले असून ते आपल्या आम्रवनात उतरले आहेत असे चुंदाने ऐकले.

6) चुंद आम्रवनात गेला आणि तथागतांच्या समीप जाऊन बसला. तथागतांनी त्याला धर्मोपदेश केला.

7) यामुळे आनंदित होऊन चुंद तथागतांना म्हणाला, "उद्या माझ्या घरी भिक्खूंसह तथागतांनी येऊन भोजन घेण्याची कृपा करावी."

8). आणि तथागत बुद्धांनी मौनानेच जणू संमती दर्शवली. तथागतांनी आपल्या आमंत्रणाचा स्वीकार केला हे जाणून चुंदाने प्रयाण केले.

9) दुसऱ्या दिवशी चुंदाने आपल्या घरी खीर वगैरे मिष्टांनाबरोबर सुकर-मद्दावांचीही सिद्धता केली (sweet rice and cakes and some preparation of Sukara-Madhava). तयारी होताच त्याने तथागतांना कळविले, "तथागत वेळ झाली. भोजन तयार आहे."

10) तथागतांनी वस्त्रे परिधान केली आणि भिक्षापात्र घेऊन भिक्खूंसहवर्तमान ते चुंदाच्या घरी आले आणि त्याने सिद्ध केलेले भोजन त्यांनी ग्रहण केले.

11) भोजनानंतर तथागतांनी चुंदास पुन्हा धर्मोपदेश केला आणि आसनावरुन उठून ते निघाले.

12) चुंदाने सिद्ध केलेले भोजन तथागतांना मानवले नाही. त्यामुळे त्यांना घोर आजार जडला. अतिसारामुळे त्यांना मरणप्राय वेदना होऊ लागल्या.

13) पण तथागतांनी स्मृतीयुक्त व अविचल राहून शांतचित्ताने स्वनियंत्रणाच्या सहाय्याने सर्व सहन केले. (But the Blessed One, mindful and self-possessed, bore it without complaint.)

14) आम्रवनात परतल्यानंतर मलशुद्धी झाल्यानंतर तथागत आनंदाला बोलले, "चल, आपण कुशिनाराला जाऊया." आणि मग सर्व जण पावाहून निघाले.